Cundiziuns generalas

1. Champ d'applicaziun

Las cundiziuns da vendita e da furniziun generalas valan, uschè lunsch ch'i n'existan betg cundiziuns spezialas u cunvegnas contractualas en scrit, disposiziuns supplementaras u divergentas. L'empustader renconuscha cun sia empustaziun resp. cun la conclusiun d'in contract da furniziun u d'execuziun da lavurs l'obligaziun da las disposiziuns contractualas generalas e spezialas, inclusivamain quellas dal lieu d'adempliment e da la dretgira cumpetenta. L'empustader renunzia uschia sin l'applitgabladad prioritara d'atgnas cundiziuns da contract.Tut las divergenzas u cumplettaziuns dumondan ina cunvegna en scrit. 

2. Pretschs e pajament

Tut ils pretschs, er quels da la glista da pretschs actuala, èn recumandaziuns nunliantas ed èn excl. taglia sin la plivalur (TPV), excl. chareschia da supplement e da liament. La chareschia da liament, resp. la chareschia da supplement vegn messa a quint tenor il stadi dal di da la furniziun. Per la chareschia da liament/supplement na datti nagins rabats. Midadas da pretsch, da sortiment e da producziun restan da tut temp resalvadas. Noss quints ston vegnir pajads senza deducziun entaifer 30 dis suenter la data dal quint. Chareschia d'emballadi e da preparaziun: La chareschia d'emballadi vegn messa a quint cun 0.80.– francs per meter dimensiun da tschinta e la chareschia da preparaziun vegn messa a quint cun 1.00.– francs per emballadi. Per empustaziuns d'unitads d'emballadi betg entiras èn mintgamai las cundiziuns fixadas decisivas.Spesas da vitgira: La furniziun vegn fatga per regla per spediziun e cun spesas da vitgira per empustaziun, per emballadi / paletta resp. per glista d'empustaziun pervia da TTPDP da 4,0 % resp. almain 100.– francs che vegnan cumprovads en moda averta (plazzals betg libers da chargia). Furniziuns vegnan facturadas vinavant per spediziun sin basa da l'ordinaziun da tariffa da la Associaziun svizra dals transports sin via. Tut ils pretschs e las indicaziuns da pli baud daventan cun quai nunvalaivels. 

3. Spediziun

Sche la rauba vegn furnida per posta u per camiun, è chaussa dal furnitur, sche pussaivel correspundentamain al giavisch dal client. La spediziun vegn fatga sin privel da l'empustader resp. dal retschavider. Ils custs d'emballadi e da vitgira sco er ils supplements per la consegna per express vegnan cumprovads en moda averta. 

4. Contestaziuns e reclamaziuns

Eventualas mancanzas concernent pais, dumber e furma da la rauba èn d'exprimer entaifer 8 dis suenter avair survegnì la spediziun tar il furnitur. Mancanzas che na pon er en cas d'examinaziun premurusa betg vegnir scuvridas entaifer quest termin, èn immediatamain d'admonir en scrit suenter avair scuvrì, il pli tard 1 mais suenter avair survegnì la rauba. Nossa prestaziun, tar contestaziuns autorisadas, è limitada sin furniziuns da remplazzament irreproschablas. Il client n'ha nagin dretg da reducziun u d'indemnisaziun da donns indirects ed immediats e donns consecutivs ch'al èn resultads u a terzs.  

5. Retratgas da rauba

Rauba retratga da memia u faussa vegn en cunvegnientscha prendida enavos ed indemnisada, sch'ella sa chatta en stadi irreproschabel, è inditgadada en ina glista da pretschs valaivla e la restituziun vegn fatga entaifer 15 dis da lavur dapi la furniziun. Per las lavurs supplementaras vegn deducida ina contribuziun a las spesas d'almain 30 % dal pretsch da vendita. Eventuals custs da chargiada e da transport vegnan mess a quint sin basa da l'ordinaziun da tariffa da l'Associaziun svizra dals transports sin via. Rauba defecta e restituziuns sut 200.– francs na vegnan betg messas a quint. 

6. Products fatgs en producziun speziala ed empustaziuns sin dumonda ed empustaziuns confermadas

Tut ils products betg cuntegnids en las glistas da pretsch uffizialas e valaivlas valan sco producziuns spezialas. Empustaziuns confermadas, ma betg consultadas u betg consultadas cumplettamain u empustaziuns sin dumonda valan sco producziuns spezialas e vegnan messas a quint. In storno d'empustaziun u ina restituziun da questa rauba n'è betg pussaivel. Nus n'essan betg obligads da tegnair al deposit tut ils products ch'èn inditgads en lur glistas da pretsch. Ina vendita intermediara resta resalvada. 

7. Termins da furniziun

Termins da furniziun vegnan inditgads tenor meglier appreziar, èn dentant per nus nunliants. Sche termins da furniziun liants èn explicitamain fixads en nossas offertas, refusain nus en cas da pussanza superiura ed autras betg tras nus provoadas circumstanzas tut la pretensiun d'indemnisaziun sin furniziuns betg fatgas u fatgas memia tard. 

8. Garanzia

En consequenza da las pussaivladads d'applicaziun multifaras e betg controllablas tras nus na pudain nus betg dar ina garanzia per la durada da vita da noss products. Per donns da persunas e donns materials ch'èn d'attribuir a sbagls u mancanzas da noss products u sin il diever direct u indirect da nossa rauba, na surpigliain nus nagina responsabladad. Ina garanzia per la stabladad cunter schelira e cunter sal da sdregliada da quests products po mo vegnir surpigliada, sche nus avain garantì questa caracteristica en nossas confermas d'empustaziun. Differenzas da colur, scoluradas u sblatgidas co ch'ellas pon vegnir avant tar mintga product da construcziun da cement, n'èn nagin motiv per reclamaziuns. En connex cun cussegliar e recumandar stain nus mo bun, uschenavant ch'ans tutga ina culpa intenziunada. 

9. Dretgs da protecziun d'autur, da patent e da marcas

Marcas, dissegns e projects restan nossa proprietad. I n'è betg permess da reproducir, da duvrar u da dar vinavant quels a terzs senza nossa approvaziun expressa. 

10. Dretgira cumpetenta

Lieu d'adempliment e dretgira cumpetenta per furniziun e per pajament sco er tut las ulteriuras obligaziuns vicendaivlas è 8772 Nidfurn. 

Glista da pretschs provisorica. Midadas resalvadas 01-01-2022